रिपोर्टर नूरखान
अमळनेर :- अमळनेर नगर परिषद निवडणूक २०२५ च्या पार्श्वभूमीवर भारतीय जनता पक्षात उमेदवारांच्या मुलाखती आज उत्साहात पार पडल्या. स्वामी विवेकानंद इंग्लिश मीडियम स्कूल येथे झालेल्या या प्रक्रियेत एकूण ९६ इच्छुक उमेदवारांनी सहभाग नोंदवला.
या मुलाखतींना भाजप जळगाव जिल्ह्याचे निवडणूक प्रभारी व राज्याचे वस्त्रोद्योग मंत्री संजयजी सावकारे, तसेच जळगाव लोकसभेच्या खासदार स्मिताताई वाघ यांच्या प्रमुख उपस्थिती लाभली. यावेळी तालुका निवडणूक प्रमुख पोपट तात्या भोळे आणि भाजप कोअर टीमचे पदाधिकारीही उपस्थित होते.
अमळनेर नगर परिषदेत एकूण १८ प्रभागांतील ३६ जागांसाठी या मुलाखती घेण्यात आल्या. यामध्ये ९२ प्रभागनिहाय उमेदवारांनी तसेच अनुसूचित जमाती आरक्षित नगराध्यक्ष पदासाठी ४ उमेदवारांनी आपली दावेदारी सादर केली. मुलाखतीदरम्यान उमेदवारांचा आत्मविश्वास, कार्यकर्त्यांचा उत्साह आणि नगरविकासाबाबतची सकारात्मक दृष्टी जाणवली.
या प्रक्रियेद्वारे आगामी निवडणुकीसाठी भाजपचे उमेदवार नियोजनबद्ध आणि पारदर्शक पद्धतीने निश्चित करण्यात येतील, असे पक्षाच्या सूत्रांनी सांगितले.
यावेळी मार्गदर्शन करताना मंत्री संजय सावकारे म्हणाले, “अमळनेरच्या सर्वांगीण विकासासाठी भाजपचे उमेदवार प्रामाणिकपणे काम करतील. जनता विकासाच्या राजकारणावर विश्वास ठेवते आणि हा विश्वास जपण्याची जबाबदारी आपली आहे.”
तर खासदार स्मिता वाघ यांनी आपल्या भाषणात म्हटले, “अमळनेर नगर परिषद निवडणूक ही संघटनशक्तीची आणि कार्यकर्त्यांच्या निष्ठेची परीक्षा आहे. जनतेचा विश्वास आणि कार्यकर्त्यांची मेहनत यांच्या बळावर भाजप निश्चितच बहुमताने विजय मिळवेल.”
या मुलाखतींना भाजप जिल्हाउपाध्यक्ष लालचंद सैनानी, डॉ. अनिल शिंदे, निरज अग्रवाल, योगेश महाजन, जिजाबराव पाटील, राहुल पाटील, बाळासाहेब पाटील, शितल देशमुख आदी पदाधिकारी उपस्थित होते.
मुलाखतींच्या या प्रक्रियेमुळे अमळनेर भाजपने आपला “विजय संकल्प” अधिक दृढ केला असून, सर्व पदाधिकारी व कार्यकर्ते एकजुटीने निवडणुकीच्या तयारीस सज्ज झाले आहेत.
