کروڑوں روپے کے گھپلوں، غیر قانونی بھرتیوں اور رشوت ستانی کے الزامات؛ افواہیں کہ سیاسی “کٹ” بند ہونے سے پرانے دھندے سامنے لائے جا رہے ہیں
مالیگاؤں: گزشتہ چند ماہ سے مالیگاؤں شہر میں تعلیمی اداروں پر کڑی نظر رکھی جا رہی ہے اور کچھ “سماجی کارکنوں” کی جانب سے اداروں کو نشانہ بنایا جا رہا ہے۔ ان کی تحقیقات میں کئی بڑے اداروں کے کروڑوں روپے کے گھپلوں، غیر قانونی بھرتیوں اور رشوت ستانی کے معاملات سامنے آئے ہیں، اور اس سلسلے میں شہر میں کئی لوگوں پر الزامات لگاتے ہوئے ایف آئی آر بھی درج کی گئی ہے۔
تین دن قبل بھی مالیگاؤں میں اردو میڈیم کی ایک بڑی تنظیم انجمن معین الطلباء کے خلاف بھی شکایت درج ہوئی ہے۔ اس سلسلے میں مالیگاؤں کے بیرونی حلقے کے ایم ایل اے اور وزیر تعلیم کو بھی کئی بار شکایت کی گئی تھی اور انہوں نے اسمبلی اجلاس میں بھی اس معاملے کو اٹھایا تھا اور کارروائی کرنے کا مطالبہ کیا تھا۔
خود ساختہ سماجی کارکنوں اور یوٹیوبرز پر اٹھتے سوالات
شہر کے خود ساختہ سماجی کارکن اور یوٹیوبرز، جو خود کو صحافی بتاتے ہیں، تعلیمی اداروں میں گھپلوں کو بے نقاب کرنے میں پوری طاقت لگا رہے ہیں۔ تاہم، شکایت ہے کہ یہ لوگ اپنے کسی لیڈر کے اشارے پر کام کر رہے ہیں۔ ان کے اس طرح کے کام سے چھوٹے ادارے، جو کسی بھی معاملے میں ملوث نہیں ہیں، سرکاری جانچ اور بلاوجہ وقت کے ضیاع کا خوف محسوس کرنے لگے ہیں۔ اس سے طلباء کی پڑھائی کا نقصان ہونے کا بھی خدشہ ظاہر کیا جا رہا ہے۔
سیاسی “کٹ” کا مسئلہ اور عوام میں چلتی افواہیں
مالیگاؤں کی عوام میں یہ بحث عام ہے کہ شہر کے سیاسی گروہوں کو ان کا ‘کٹ’ ملنا بند ہو گیا ہے، اسی لیے وہ خود ساختہ سماجی کارکنوں اور یوٹیوبرز کے ذریعے بدعنوانی کو بے نقاب کروا رہے ہیں تاکہ ادارے اپنا “حصہ” دوبارہ شروع کر سکیں۔
اس صورتحال میں ان اداروں کو بھی نقصان ہو سکتا ہے جو کسی بھی معاملے میں ملوث نہیں ہیں۔ والدین کو بھی تشویش ہے کہ جانچ کے دوران طلباء کی پڑھائی کو بھاری نقصان پہنچے گا۔ جن اداروں پر الزامات ہیں، وہ اپنی لڑائی عدالت میں لڑیں گے، لیکن شہر کے یوٹیوبرز اپنے لیڈروں کے اشاروں پر معاملات کو ہوا دے کر عوام کو گمراہ کر رہے ہیں۔ ایسی صورتحال میں مطالبہ کیا جا رہا ہے کہ پولیس انتظامیہ کو ایسے یوٹیوب چینلز اور سماجی کارکنوں پر روک لگانا چاہیے۔
