Nasik – Waseem Raza Khan
برصغیر کے نامور شاعر، نقاد، لغت نویس اور محقق سلیم شہزاد کو مہاراشٹر اردو ساہتیہ اکیڈمی نے ان کی 55 سالہ گراں قدر ادبی خدمات کے اعتراف میں مرزا غالب لائف ٹائم اچیومینٹ ایوارڈ دینے کا اعلان کیا ہے۔ یہ ایوارڈ اردو ادب میں ان کی نصف صدی سے زائد کی مسلسل اور بااثر کاوشوں کا صلہ ہے۔
ایوارڈ میں ایک لاکھ روپے نقد اور اعزازی شیلڈ شامل ہے جو جلد ہی ایک باوقار تقریب میں سلیم شہزاد کو پیش کیا جائے گا۔ ساہتیہ اکیڈمی کے اس اعلان کو ادبی حلقوں میں سراہا جا رہا ہے۔
سلیم شہزاد: ایک مختصر تعارف
سلیم شہزاد دورِ حاضر کے ایک ممتاز ناقد، محقق، شاعر، ادیب، افسانہ نگار، ناولسٹ، ماہر لسانیات اور ماہر تعلیم ہیں۔
پیدائش: آپ کی پیدائش یکم جون 1949ء کو دھولیہ، مہاراشٹر، بھارت میں ہوئی۔
تعلیم اور پیشہ: انہوں نے اپنی تعلیم مالیگاؤں میں حاصل کی اور ایم۔ اے (انگریزی) کی ڈگری کے بعد درس و تدریس کے شعبے سے وابستہ رہے اور بعد میں وظیفہ یاب ہوئے۔
ادبی خدمات: اردو اور انگریزی ادب کی تمام اصناف پر ان کی گہری نظر ہے۔ انہوں نے تنقیدی کتابوں کے علاوہ لسانیات اور اردو قواعد پر بھی اہم کام کیا۔ سلیم شہزاد کی مطبوعات کا دائرہ بہت وسیع ہے، ان میں سے چند اہم تصانیف جن میں ناول دشتِ آدم، ویر گاتھا، سانپ اور سیڑھیاں، تنقیدی مجموعےجدید شاعری کی ابجد، قصہ جدید افسانے کا، بیان کی وسعت، متن و معنی کا تجزیہ، سازِ فسانگی کے علاوہ لغات (ڈکشنریاں) و لسانیات میں فرہنگِ ادبیات (دو ایڈیشن)، فرہنگِ لفظیاتِ غالب، جیم سے جملے تک (لسانیات پر کتاب) جیسی گراں قدر کاوشیں شامل ہیں. ان کی خدمات نے اردو تحقیق، تنقید اور لغت نویسی کے شعبوں پر گہرے اثرات مرتب کیے ہیں۔
